A escritora Rosa Aneiros presentará este mércores 4 de novembro, a partir das 10h30 da mañá, o audiolibro A noite das cebolas nun encontro con persoas usuarias da Asociación Dano Cerebral Santiago de Compostela. O acto terá lugar na propia sede da Asociación, na rúa Pedro Cabezas González 3, nunha iniciativa que pon o foco na necesidade de eliminar as barreiras que poden dificultar o acceso á cultura.
Publicada por Xerais no 2024, A noite das cebolas foi recoñecida co Premio Novela Europea Casino de Santiago neste 2026, galardón arredor do que se organiza este encontro, e tamén foi recoñecida no 2025 co Premio Follas Novas do Libro Galego de Narrativa. A través dunha historia na que se entrelazan a fraxilidade, os coidados, a memoria, a culpa e a beleza das pequenas cousas, Rosa Aneiros constrúe en A noite das cebolas un relato sobre a capacidade da vida para sorprendernos mesmo nas circunstancias máis adversas.
Neste encontro participarán Luciano Fernández Pintor, presidente da Asociación Dano Cerebral Santiago de Compostela, Fran Alonso, director de Edicións Xerais, Maribel Martín, vicepresidenta da Asociación Cultural Casino de Santiago e pechará a propia Rosa Aneiros.
A cita propón o achegamento tanto á obra como á súa adaptación ao formato sonoro, ao tempo que reivindica a importancia de garantir o acceso á literatura en condicións de igualdade, independentemente das capacidades de cada unha das persoas que se gozan dela.
Sobre a autora:
Rosa Aneiros (Meirás, Valdoviño, 1976) é xornalista e traballa no Consello da Cultura Galega, ademais de colaborar habitualmente en distintos medios de comunicación. Na súa traxectoria literaria destacan pezas como Sol de Inverno, Premio Xerais de Novela, Ás de bolboreta, Premio Fundación Caixa Galicia de Literatura Xuvenil ou Xelís, o guieiro das botellas de mar, Premio Merlín de Literatura Xuvenil. Con A noite das cebolas, a autora volve explorar a fraxilidade humana, os vínculos afectivos e a posibilidade de atopar esperanza nos momentos máis difíciles.
share